La poesia di addio al centro storico di “Lino timbro”

“50ann xe passà!

El 25 agosto del '62 me par pena drio el canton ...
Inveçe in sta vecia Piassa dee Erbe dal saiso consumà,
un Orteseo de targhe, de timbri e de incision gavemo 'npiantà,
na vita longa de botega, co' muci de problemi inpensai,
idee stranbe par un mestier tuto novo... ma con vaidi boce
de botega se podeva lavori inventar e par doman consegnar,
el tempo alora nol contava, “Fare” jera el nostro moto,
el cliente 'ndava sempre riverio e contentà.

Le ore scandie dal campanon inpienava el quotidian,
la fontana impissava arcobaeni co' zughi de alegria
el fis-ciar del vento imuciava el ciacoar de a zente
incatijà a l'odor de fruta, de orto, de pan,
de vita ormai scanceà.

Desso Piassa Garibaldi pì lustra pì bea e sensa macie
la zè deventà! Ma co' le strade sbarà,
le auto sbatue de qua e de là, tuto se ga rabaltà,
ciò el marcà se ga globaixà, el viver ze cambià!

Cossì el centro dea nostra bea... ma picola Bassan
i vol sarar par farla somejar a Verona,
Firenze o come Milan.

Ma façendo cossì sta botega de piassa vegnarà penaizà,
parché qua riva anca el cliente de fabrica e l'artigian
che no i ga tempo de fare “4 passi a Bassan”.
Ancò a zente varda e comodità, i serca el parchegio
e la coa i fa ai supermercà, parché i trova
caldo d'inverno e fresco d'istà... senza pagar.

Stò tristo andasso nol va ben, fa intavanar
e meditar me fioj
che in stà vecia botega i voria ancora continuar.
Cossì fora le mura,
ma parfin fora el Comune de Bassan,
là “a bordo Casso.la” i a vol strassinar.
Mi vecio e 'na s-cianta rincojonà son diventà,
me se strenze el cor el magon me ga ciapà
parché fora dal centro, fora da la me Bassan,
dopo 50ann me toca 'ndar.

Lino timbro”

P.S. Grande Lino! Se vedemo a Casso.la.